Reperi dhe këngëtari i njohur, Machine Gun Kelly, ka thyer heshtjen pas ndarjes së bujshme nga aktorja Megan Fox, duke përshkruar hapur përjetimet dhe vuajtjet e tij në këngën më të fundit nga albumi i tij i shtatë, “Lost Americana”.

Në hitin “Treading Water”, artisti 35-vjeçar rrëfen betejën personale me pendesën, trishtimin dhe izolimin pas një periudhe të errët në jetën e tij. Me fjalë të forta dhe emocionale, Machine Gun Kelly pranon gabimet e tij dhe dhimbjen që ka lënë pas ndarja, duke kënduar: “E rrëzova këtë shtëpi… do të ndryshojë për vajzën time, që ajo të mos jetë vetëm”.

Saga Blade, vajza e çiftit, e cila lindi në mars të këtij viti, është shpresa që reperi përmend si motiv për të ndryshuar rrugën e tij, pas një periudhe të kaluar në qendrën e rehabilitimit. Ai rrëfen se gjatë Krishtlindjeve kaloi në Dhomën 3 të kësaj qendre, duke përjetuar një proces të vështirë shpëtimi dhe reflektimi.

Ndarja nga Megan Fox ndodhi pas zbulimit të mesazheve komprometuese në telefonin e tij, që dëshmonin për pabesi dhe tensione të mëdha mes tyre. Në këngë, Machine Gun Kelly nuk fsheh këtë pjesë të errët të jetës së tij: “Gënjeshtrat nuk vdesin, ato rriten, dhe çdo gjë që përpiqesh të fshihësh, përfundimisht del në shesh.”

Ky album dhe kënga “Treading Water” sjellin për herë të parë zërin autentik të reperit pas turbulencave, duke shpalosur një histori dhimbjeje, pendese dhe dëshire për ndryshim – një rrëfim që do të prekë zemrat e fansave dhe jo vetëm.