Presidenti francez Emmanuel Macron i kërkoi kryeministrit izraelit Benjamin Netanyahu të dielën që të ndalojë sulmet në Gaza dhe të rikthehet armëpushimi me Hamasin.

“I bëra thirrje kryeministrit izraelit që t’i japë fund goditjeve në Gaza dhe t’i kthehet armëpushimit, të cilin Hamasi duhet ta pranojë. Theksova se ndihma humanitare duhet të dorëzohet sërish menjëherë”, shkroi Macron në rrjetin social X.

Kjo ndërhyrje vjen pasi Izraeli rifilloi bombardimet intensive të territorit palestinez më 18 mars, duke i dhënë fund një armëpushimi gati dy mujor pas sulmit të Hamasit më 7 tetor 2023.

Të dielën, një sulm ajror izraelit në Khan Yunis vrau të paktën tetë persona, përfshirë pesë fëmijë, ndërsa palestinezët e zhvendosur po festonin Fitër Bajramin.

Macron gjithashtu i bëri thirrje Izraelit të respektojë armëpushimin në Liban, pas bombardimeve izraelite të fortesës së Hezbollahut në jug të Bejrutit të premten. Ministria e Shëndetësisë e Libanit raportoi se sulmet kishin vrarë pesë persona, ndërsa Macron i quajti ato një shkelje të papranueshme.

Ndërkohë, Netanyahu ka paralajmëruar se Izraeli do të godasë çdo kërcënim nga Libani, duke deklaruar se “ekuacioni ka ndryshuar”.