Një ngjarje e rëndë është regjistruar pasditen e së hënës në Qafën e Llogarasë, ku një automjet tip BMW është përfshirë nga flakët dhe brenda tij është gjetur trupi i pajetë i një personi, i djegur plotësisht.

Sipas njoftimit paraprak të Policisë, ngjarja ka ndodhur rreth orës 14:35, në zonën që të çon drejt antenave. Pas marrjes së sinjalizimit, shërbimet zjarrfikëse dhe policore janë nisur drejt vendngjarjes, ku kanë bërë të mundur shuarjen e flakëve, por automjeti ishte shkrumbuar totalisht.

Nga verifikimet e para rezulton se makina ka dalë nga rruga dhe është djegur në një zonë me shkurre, çka ka ndihmuar në përhapjen e zjarrit. Viktima është gjetur në sediljen e drejtuesit të mjetit, ndërsa për shkak të djegies së plotë, targa e automjetit nuk ka mundur të identifikohet dhe personi mbetet ende i paidentifikuar.

Burime nga grupi hetimor bëjnë me dije se nuk përjashtohet pista e një atentati, pasi ka dyshime se viktima mund të jetë vrarë fillimisht dhe më pas automjeti është djegur për të fshehur gjurmët e krimit.

Grupi hetimor ndodhet në vendngjarje dhe po vijon punën për identifikimin e viktimës dhe zbardhjen e plotë të rrethanave të kësaj ngjarjeje.