Një ngjarje dramatike, që ngjan me skenarët e filmave të aksionit, ka tronditur qytetin e Malagës në Spanjë. Tre shtetas shqiptarë dhe një oficer policie humbën jetën mëngjesin e sotëm, pas një ndjekjeje të furishme që përfundoi në përplasje fatale mes dy automjeteve.

Sipas mediave spanjolle, të tre shqiptarët ishin pjesë e një bande të strukturuar kriminale, e specializuar në grabitjen e farmacive në rajonin e Andaluzisë. Ngjarja nisi rreth orës 04:45 të mëngjesit, kur u aktivizuan alarmet e një farmacie në lagjen Puerto de la Torre. Sipas hetimeve paraprake, autorët kishin manipuluar sistemin e sigurisë dhe ishin futur në ambientet e brendshme pa përdorur forcë mbi roletat, duke synuar sirtarin e parave pranë banakut.

Pavarësisht përpjekjeve për ta shkëputur me vare, makina e parave ishte e ankoruar në dysheme, dhe tentativa e tyre rezultoi e pasuksesshme. Autorët u larguan me një automjet të fuqishëm, ndërsa forcat e rendit nisën ndjekjen intensive.

Rreth orës 05:30, në një dalje të autostradës A-7 në drejtim të Torremolinosit, ndodhi aksidenti fatal. Sipas informacioneve të para nga Garda Civile e Qarkullimit, dyshohet se makina e shqiptarëve po lëvizte në sens të kundërt kur u përplas ballazi me mjetin e një oficeri policie, i cili po kthehej në shtëpi pas përfundimit të turnit të natës. Të katërt humbën jetën në vend.

Ngjarja ka shkaktuar tronditje të thellë në opinionin publik dhe në radhët e forcave të sigurisë, duke rikthyer në vëmendje serinë e grabitjeve ndaj farmacive që kanë ndodhur në Malaga në muajt e fundit. Autoritetet spanjolle janë duke vijuar hetimet për të zbuluar nëse banda ishte përfshirë në ngjarje të tjera të ngjashme dhe nëse ka persona të tjerë të përfshirë.

Kamerat e sigurisë të një tjetër farmacie, e grabitur pak javë më parë në të njëjtën zonë, kanë regjistruar dy meshkuj me fytyra të mbuluara dhe të armatosur me vare dhe sëpatë, duke thyer xhamin dhe duke marrë sirtarët e parave. Policia po heton për të parë nëse këto grabitje janë të lidhura mes tyre.

Ngjarja tronditëse hedh dritë mbi rrezikun në rritje që po përfaqësojnë grupet kriminale ndërkombëtare për sigurinë publike në qytetet spanjolle.