Një skandal i ri ka tronditur Eurovision 2025, pas akuzave për manipulim të televotimit, që sipas transmetuesve të disa vendeve i dha Izraelit një vend të dytë të papritur në renditje, përkundër zero pikëve nga juritë profesionale të shumë shteteve.
Sipas “The Telegraph”, transmetuesit publikë të Spanjës (RTVE) dhe Belgjikës (VRT) kanë kërkuar hetim të sistemit të televotimit, duke shprehur dyshime serioze për manipulim të organizuar të votave nga publiku. Izraeli mori 357 pikë nga televotimi, një shifër shumë e lartë në kontrast me zero pikët që mori nga juritë e këtyre vendeve.
Çfarë ngre shqetësim?
Në Eurovision, çdo shtet ndan pikët në mënyrë të ndarë nga juria dhe publiku, me 12 pikë maksimale për secilën kategori. Por ajo që ngjalli polemika është fakti që televotimi lejon deri në 20 vota për person, me pagesë – një sistem që, sipas deputetes flamande Katia Segers, krijon hapësirë për manipulim të organizuar, sidomos në favor të një vendi me mobilizim të lartë ndërkombëtar.
Ajo i kërkoi VRT-së të udhëheqë një hetim të brendshëm në kuadër të EBU-së jo vetëm për sistemin e votimit, por edhe për vetë pjesëmarrjen e Izraelit, në kontekstin e konfliktit në Gaza dhe hetimeve ndërkombëtare për krime lufte.
Tensione politike dhe protesta
Këngëtarja izraelite Yuval Raphael u përball me protesta pro-palestineze gjatë finales që u zhvillua në Bazel, Zvicër. Gjatë performancës së saj, disa protestues tentuan të futen në skenë, por u ndaluan nga sigurimi.
RTVE nga ana tjetër, shfaqi një mesazh solidariteti me Palestinën gjatë transmetimit direkt, me frazën:
“Kur të drejtat e njeriut janë në rrezik, heshtja nuk është një opsion.”
Reagimi zyrtar i organizatorëve
Drejtori i Eurovision-it Martin Green mohoi çdo parregullsi, duke deklaruar se “votimi monitorohet nga ekipe të pavarura”. Megjithatë, VRT paralajmëroi se pa transparencë të plotë mbi procesin e votimit, pjesëmarrja e saj në Eurovision mbetet në pikëpyetje.
Fituesit dhe renditja finale
• Fitues: Austria, me këngën “Wasted Love” nga JJ – 436 pikë (258 nga juria, 178 nga televotimi)
• Izraeli: Vend i dytë – 357 pikë nga televotimi, 0 pikë nga shumë juri
• Shqipëria: Vendi i tetë, me këngën “Zjerm” nga Shkodra Elektronike
Skandali i këtij viti mund të riformatojë rregullat e garës ose të çojë në bojkot të mundshëm të disa shteteve në edicionin e ardhshëm.
