Pas përfundimit të procesit të rinumërimit të 586 kutive të votimit në qarkun e Fierit, ka ardhur reagimi i parë zyrtar nga Komisioni i Ankimimeve dhe Sanksioneve (KAS), ku u pohua ekzistenca e manipulimeve në rezultatet e kandidatëve.

Anëtari i KAS-it, Ledio Braho, deklaroi se do t’i referohen Prokurorisë së Fierit të gjitha materialet dhe tabelat ku janë konstatuar lëvizje të votave, duke i cilësuar këto si manipulim të pastër zgjedhor.

“Do t’i përcjell Prokurorisë së Fierit të gjitha tabelat ku lëvizin votat. Kishte manipulim,” – u shpreh Braho.

Procesi i rinumërimit u kërkua nga përfaqësues të Partisë Demokratike, të cilët ngritën dyshime për parregullsi në administrimin e votave të kandidatëve në disa qendra votimi.

Gjetjet pritet të shkaktojnë zhvillime të reja ligjore dhe politike në ditët në vijim, ndërsa vëmendja përqendrohet tek veprimet e Prokurorisë dhe Komisionit Qendror të Zgjedhjeve (KQZ).