Zbulimi i trupit të të riut më 8 dhjetor 2020 tronditi autorët e dyshuar, të cilët u vunë në lëvizje për të manipuluar analizat e ADN-së dhe për të fshehur çdo gjurmë që mund të lidhej me ngjarjen. Hetimet e mëtejshme, të bazuara mbi përgimet e rrjetit të koduar SkyEcc, zbuluan një seri përpjekjesh për të ndërhyrë te ekspertët mjekoligjorë dhe për të shkatërruar pajisje elektronike që mund të implikonin të dyshuarit.

⸻

Bisedat SkyEcc – 9 Dhjetor 2020

Një nga të dyshuarit, i koduar si “Personi A”, bisedon me bashkëpunëtorin e tij “Boli” për të shkuar në banesën e tij dhe për të shkatërruar telefonat që mund ta implikonin.

Personi A: “A e more çantën? Mbaj vetëm një iPhone, të tjerat digji.”
Boli: “Po, gjithçka e mora.”
Personi A: “Shko në shtëpi, merr rrobat, pasaportën dhe cigaret, dhe jepi dikujt që t’i çojë te unë.”

Nga këto biseda kuptohet se i dyshuari ishte i shqetësuar për gjetjen e eshtrave dhe synonte të shfrytëzonte persona të tjerë për të shmangur kontaktin direkt me policinë.

Bisedat SkyEcc – 27 Janar 2021

Në një tjetër bisedë, Personi A diskutohet me një person të panjohur (P2), i cili kishte takuar një avokat dhe një figurë të rëndësishme lokale. P2 i dorëzon faqen e fundit të një dokumenti me vendimin për kryerjen e ekspertimit të ADN-së.

P2: “Kam çuar dy nga njerëzit tanë te policia të thonë që personi i gjetur nuk ishte me pantallona të shkurtra.”

Personi A: “Po me ndërruar gjakun s’ka shans. Kur ta çojnë për ADN, do marrim kampion gjaku dhe aty mund t’i manovrojmë.”

Personi A: “Këto të ADN-së që i bëjnë në kafkë nuk nxjerrin se kush është, vetëm moshën dhe kohën e humbjes. Por nuk dua ta lë me kaq.”

I dyshuari mendon më pas një plan tjetër: kërcënimin e oficerëve të policisë gjyqësore që do të dorëzonin provat.

Personi A: “Këta dy oficerë do i përballojmë në rrugë dhe do t’ua marrim provat.”

P2: “Do bëhet rrëmujë e madhe, prish punë shumë.”

Personi A: “Po ta dijmë që janë të gjitha aty, le të bëhet ç’do të bëhet. Vetëm ta di dy orë para.”

Bisedat SkyEcc – 27 Dhjetor 2021

Personi A bisedon përsëri me një bashkëpunëtor tjetër për të marrë informacion mbi laboratorin ku do të kryhej analiza e ADN-së.

Personi A: “Ça bëre? Kjo është adresa e laboratorit, pyet njëherë personin Fuat.”

Bashkëpunëtori: “Po, do të pyes.”

Megjithëse të përfshirët tentuan të manipulojnë provat, analizat e ADN-së konfirmuan identitetin e viktimës, duke e lidhur atë me trupin e gjetur. Ky rezultat lejoi autoritetet të kryejnë arrestime dhe të ndërmarrin veprime ligjore ndaj personave të dyshuar, ndërsa disa të tjerë janë ende në kërkim.