Ish-kryeministri i Holandës, Mark Rutte, do të marrë udhëheqjen e Organizatës së Traktatit të Atlantikut Verior (NATO) më 1 tetor, duke u angazhuar të mbajë bashkë aleancën në një kohë të vështirë. Ai merr postin e sekretarit të Përgjithshëm të NATO-s në një moment kritik për shkak të luftës në Ukrainë, e cila ka hyrë në një fazë të rëndësishme, dhe zgjedhjeve presidenciale në Shtetet e Bashkuara që po afroheshin.
Ceremonia e kalimit të detyrës do të mbahet në selinë e NATO-s në Bruksel, ku Rutte do të marrë përgjegjësinë e udhëheqjes nga norvegjezi Jens Stoltenberg, i cili ka drejtuar aleancën gjatë një dekade të trazuar. Gjatë kësaj periudhe, NATO është përballur me sfida të mëdha, sidomos pas pushtimit të Ukrainës nga Rusia në vitin 2022.
Zyrtarët e NATO-s dhe diplomatët presin që Rutte të vazhdojë të ndjekë prioritetet e Stoltenbergut, përfshirë mbështetje të vazhdueshme për Ukrainën, inkurajimin e shteteve anëtare për të rritur shpenzimet në mbrojtje dhe ruajtjen e angazhimit të Shteteve të Bashkuara në sigurinë evropiane. Megjithatë, pasiguria mbetet përsa i përket mbështetjes së ardhshme të SHBA-së për NATO-n dhe Ukrainën, duke marrë parasysh se Donald Trump, i njohur për skepticizmin e tij ndaj aleancës, është në një garë të ngushtë zgjedhore me nënpresidenten amerikane, Kamala Harris.
