Një ngjarje tragjike ka tronditur Shtetet e Bashkuara mëngjesin e së mërkurës, kur një person i armatosur hapi zjarr gjatë meshës në Annunciation Catholic School në Minneapolis, duke shkaktuar dy viktima të mitura dhe 17 të plagosur, shumica fëmijë.
Sulmuesi, i identifikuar si Robin Westman, 23 vjeç, ishte i pajisur me pushkë, pistoletë dhe shotgun. Ai hapi zjarr nga dritaret e kishës, duke vrarë dy fëmijë 8 dhe 10 vjeç dhe duke plagosur nxënës të moshës 6 deri në 15 vjeç. Tre të moshuar që po merrnin pjesë në meshë ndodhen gjithashtu mes të plagosurve.
Pas sulmit, Westman u gjet i vdekur në parking, pasi qëlloi veten. Spitalet lokale konfirmojnë se disa prej fëmijëve janë ende në gjendje kritike.
Panik dhe reagime emocionale
Prindër të tronditur vrapuan drejt shkollës për të gjetur fëmijët e tyre, ndërsa mijëra qytetarë u mblodhën në mbrëmje në një vigil me qirinj dhe lutje. Në tubim morën pjesë senatorja Amy Klobuchar, deputetja Ilhan Omar dhe kryebashkiaku Jacob Frey, të cilët shprehën dhimbjen dhe solidaritetin me komunitetin.
Hetimet: FBI e cilëson akt terrorizmi
Sipas autoriteteve, FBI e ka cilësuar ngjarjen si akt terrorizmi të brendshëm dhe krim urrejtjeje kundër katolikëve. Në banesën e autorit u gjetën shënime dhe një manifest online, ku ai shfaqte ide raciste dhe obsesion për masakrat e mëparshme. Hetimet kanë zbuluar gjithashtu se armët ishin blerë ligjërisht vetëm pak kohë më parë.
Reagime nga liderët amerikanë
Presidenti Donald Trump dhe ish-presidentët Joe Biden, Barack Obama dhe Bill Clinton kanë shprehur ngushëllime për viktimat, ndërsa Guvernatori i Minnesotës, Tim Walz, ka shpallur ulurjen e flamujve në gjysmështizë.
Kryebashkiaku Jacob Frey tha se “lutjet nuk mjaftojnë”, duke bërë thirrje për masa konkrete për kufizimin e armëve. Ndërkohë, organizata Moms Demand Action përsëriti thirrjen për ndalimin e armëve gjysmë-automatike, duke deklaruar: “Mjaft është mjaft.”
Një vend në zi
Kjo është masakra e pestë në një shkollë në SHBA vetëm gjatë vitit 2025, duke shtuar presionin mbi autoritetet për reforma të shpejta në ligjet për armët. Komuniteti i Annunciation është i shokuar, por përfaqësuesit e kishës deklaruan:
“Në këtë errësirë, do të mbajmë gjallë dritën e shpresës.”
