Tirana u mbulua nga dhimbja këtë të premte, teksa aktori, regjisori dhe dramaturgu i njohur Naun Shundi u përcoll për në banesën e fundit. Shundi ndërroi jetë më 28 gusht, në moshën 66-vjeçare, pas një beteje të shkurtër, por të mundimshme me një sëmundje të rëndë.

Homazhet u zhvilluan në ambientet e Teatrit “ArTurbina”, ku dhjetëra kolegë, miq dhe artdashës u mblodhën për t’i dhënë lamtumirën e fundit. Lot, lule dhe kujtime mbushën sallën, ndërsa figurat më të mëdha të teatrit dhe kinematografisë shqiptare shprehën përulësinë dhe respektin për artistin që la gjurmë të pashlyeshme.

Dhimbja e vajzës: “Nuk na tha asnjë fjalë”

Mes emocioneve, vajza e Naun Shundit dha një mesazh prekës për humbjen e babait:

“E hëngri kanceri nga brenda. Nuk na tha asnjë fjalë. Mjekët nuk na treguan kurrë se babai do të vdiste. Ai mendonte se do të jetonte. Edhe pse iku, la pas ‘Zonjën e Bujtinës’, dhe jetën ia kushtoi teatrit. Nuk e di ku është e drejta, por ai që e ka, e ka në zemër.”

Homazhet dhe kujtimet e kolegëve

Në homazhe morën pjesë emra të njohur të skenës dhe ekranit. Aktori Bujar Asqeriu e përshkroi Shundin si një figurë universale të artit shqiptar:

“Sot është një ditë dhimbjeje dhe trishtimi për publikun shqiptar që e ndoqi me duartrokitje artin e tij. Nauni ishte regjisor, aktor, dramaturg – por mbi të gjitha një burrë fisnik. Ishte nga ata artistët e mëdhenj, modestë, që nuk e theksonin kurrë veten, por linin veprën të fliste.”

Një trashëgimi e artit shqiptar

Naun Shundi do të kujtohet për kontributin e tij të çmuar në teatrin dhe dramaturgjinë shqiptare. Ai la pas një trashëgimi artistike që do të jetojë gjatë në kujtesën e publikut, ndërsa figura e tij mbetet një simbol i përkushtimit ndaj artit.