Kylian Mbappé, aktualisht në grumbullim me kombëtaren e Francës në Clairefontaine, ka folur me respekt për talentin e ri të Barcelonës, Lamine Yamal, gjatë një interviste për Movistar.

Sulmuesi i Real Madridit theksoi se Yamal duhet të gjykohet vetëm për atë që bën në fushë dhe jo për jetën private:

“Dallohet që ka një pasion të madh për futbollin, dhe kjo është gjëja e vetme që nuk duhet ta humbasë. Gjithçka tjetër i përket jetës së tij private, për të cilën flitet shumë. Duhet ta lërë të qetë.”

Mbappé shtoi se në moshën 18-vjeçare, të gjithë bëjnë gabime dhe marrin vendime të drejta e të gabuara, por rëndësi ka performanca në fushë:

“Në futboll është një lojtar i madh, por në jetë është vetëm një djalosh 18-vjeçar. Me kohë do të mësojë, do të kuptojë çfarë është më mirë për të. Ka një talent të jashtëzakonshëm dhe i uroj fat në rrugëtimin e tij.”

Me këto deklarata, Mbappé tregoi pjekuri dhe respekt për brezin e ri, duke mbrojtur privatësinë dhe zhvillimin personal të Yamal, rivalit të tij në La Liga.