Irani ka qenë një nga furnizuesit kryesorë të pajisjeve ushtarake për Rusinë vitet e fundit, veçanërisht pas nisjes së pushtimit në shkallë të plotë të Ukrainës në vitin 2022. Megjithatë, sipas ekspertëve të sigurisë, kjo mbështetje nuk ka më peshën vendimtare që kishte në fazat e hershme të luftës.

Një raport i Bloomberg, i publikuar më 12 janar dhe që citon një zyrtar perëndimor të sigurisë, thekson se shitjet iraniane të raketave drejt Rusisë – përfshirë raketa balistike dhe të mbrojtjes ajrore – kanë arritur në rreth 2.7 miliardë dollarë që nga tetori i vitit 2021. Moska nuk publikon të dhëna zyrtare mbi vëllimin e tregtisë ushtarake, ndërsa Irani mohon çdo furnizim me armë.

Në një deklaratë të majit të vitit të kaluar, misioni i përhershëm i Iranit pranë OKB-së pretendoi se Teherani do të përmbahej nga ofrimi i ndihmës ushtarake për palët në konflikt. Por prova të shumta, përfshirë përdorimin masiv të dronëve sulmues iranianë Shahed nga Rusia në fazat e para të luftës, hedhin dyshime mbi këtë qëndrim.

Sipas analistëve, kulmi i bashkëpunimit ushtarak mes dy vendeve tashmë ka kaluar. Hanna Notte, drejtuese e programit për Euroazinë në Qendrën James Martin për Studime mbi Mospërhapjen, thekson se edhe pse disa transferime dronësh kanë vazhduar deri vitin e kaluar, roli i Iranit është ndjeshëm më i kufizuar.

Edhe analisti Ruslan Suleymanov vëren se Rusia nuk është më aq e varur nga armët iraniane. Dronët Shahed tashmë prodhohen në territorin rus me emrin Geran, ku rreth 90 për qind e ciklit të prodhimit realizohet pa ndihmën direkte të Iranit. Një fabrikë në Alabuga, në rajonin e Tatarstanit, prodhon vazhdimisht këta dronë, bazuar në teknologjinë dhe trajnimin fillestar iranian.

Sipas autoriteteve ukrainase, Rusia prodhon rreth 5.000 dronë me rreze të gjatë veprimi çdo muaj, përfshirë dronët goditës Geran dhe Gerbera, këta të fundit të përdorur si karrem për të mbingarkuar mbrojtjen ajrore të Ukrainës.

Në këtë kontekst, ekspertët vlerësojnë se ndikimi i Iranit në përpjekjen ushtarake të Moskës është zvogëluar ndjeshëm, ndërsa Rusia ka arritur një nivel më të lartë autonomie në prodhimin e armëve kyçe.