Anija me mbetjet e dyshuara të rrezikshme do të qëndrojë në radë në Portin e Durrësit derisa të nisin procedurat për ankorimin e saj. Prokuroria e Durrësit ka njoftuar se anija do të mbetet në radë deri sa të sigurohet një vend i përshtatshëm për ankorim, duke theksuar se vonimi i sekuestros është i lidhur me kompleksitetin e çështjes, përfshirë volumin dhe llojin e sendeve që janë në proces sekuestrimi.

Deri në përfundimin e sekuestros për 102 konteinerët që dyshohet se mbartin mbetje të rrezikshme, Policia e Shtetit do të monitorojë anijen. Prokuroria ka njoftuar gjithashtu se analiza e lëndëve të dyshuara do të kryhet në laboratorë vendas, në bashkëpunim me Fakultetin e Gjeologjisë dhe Minierave, Fakultetin e Shkencave të Natyrës dhe Agjencinë Kombëtare të Burimeve Natyrore.

Njoftimi i Prokurorisë sqaron se për shkak të interesit të lartë publik rreth këtij rasti, do të vazhdojë të informojë opinionin mbi hapat e mëtejshëm të procesit. Aktualisht, Autoriteti Portual nuk ka përcaktuar ende vendin ku do të ankorohen dhe ruhet anija “Moliva”, me argumentin se nuk ka kushte për monitorim dhe siguri.

Mbetjet teknologjike të industrisë së uzinës së shkrirjes së çelikut në Elbasan duhet të ruhen në vende të sigurta, sipas urdhrit të Prokurorisë. Anija ndodhet aktualisht 1,5 milje nga porti, në radën e jashtme, dhe pritet të vendoset nëse do të futet brenda kalatës së portit për ruajtje ose jashtë saj në një magazinim të sigurt.