Rreth 5 370 fermerë kanë aplikuar në 19 ditët e parë të hapjes së aplikimeve për financimin e kultivimit të grurit në vend.

Ministrja e Bujqësisë dhe Zhvillimit Rural, Frida Krifca bëri të ditur se, të interesuarit janë nga i gjithë vendi, për një sipërfaqe prodhimi mbi 24 mijë hektarësh.

Sipas Krifcës, Fieri, Korça, Shkodra, Vlora janë qarqet me aplikimet më të larta deri tani.

Po ndërkohë që interesi i fermerëve për të përfituar mbështetjen financiare prej 30 mijë lekë për hektarë, për sipërfaqe jo më pak se 1 hektarë, duket se është i lartë edhe në qarqe të tjera të vendit. Aplikimet për subvencionin e mbjelljeve të reja të grurit vijon deri në datën 23 shtator 2022.

Fondi total i akorduar nga qeveria për të nxitur prodhimin e grurit në vend si masë parandaluese ndaj tranzicionit të tregjeve ndërkombëtare për shkak të luftës Rusi-Ukrainë është 500 milionë lekë.

Ministria e Bujqësisë synon që përmes kësaj skeme por edhe asaj të mbështetjes me naftë pa taksa, të lehtësojë buxhetet e fermerëve për punët në bujqësi dhe të ulë kostot në prodhim.