Organizata Ndërkombëtare për Migracionin (IOM) ka njoftuar se mbi 60 emigrantë besohet se kanë humbur jetën në një anije të mbytur në brigjet e Libisë. Agjencia e OKB-së ka cituar të mbijetuarit nga ngjarja, duke bërë të ditur se anija ka nisur nga qyteti i Zuwara me rreth 86 persona në bord.

Dallgët e larta, sipas të dhënave të marra nga të mbijetuarit, kanë përmbytur varkën, duke lënë 61 emigrantë të zhdukur dhe supozuar të vdekur. Incidenti ka ndodhur në një nga pikat kryesore të nisjes për emigrantët që përpiqen të kalojnë Mesdheun dhe hyjnë në Evropë, duke bërë rrugën nga Libia.

Organizata Ndërkombëtare për Migracionin ka njoftuar se nga fillimi i vitit, mbi 2,200 njerëz janë mbytur duke tentuar kalimin nëpër këtë rrugë migrimi, duke e bërë atë një nga rrugët më të rrezikshme të migrimit në botë. Shumica e viktimave të këtij incidenti të fundit raportohen të jenë nga Nigeria, Gambia dhe vende të tjera afrikane.