Nesër do të mbahet një mbledhje e këshillit bashkiak të Himarës, për herë të parë pas arrestimit të kryetarit të bashkisë, Jorgo Goro.

Këshilli bashkiak pritet të caktojë njërin prej dy nënkryetarëve të bashkisë në detyrën e kryetarit, ndërsa prefekti i qarkut të Vlorës, Vangjel Tavo, sqaron procedurat e mundshme për këtë proces.

‘Nuk ka votë, fletë votimi, kuti votimi, komision votimi. Por vetë këshilli cakton. Procedurën se si e cakton është punë e tyre. Mundet që një nga anëtarët e këshillit të propozojë një nga dy nënkryetarët dhe të kërkohet miratimi me ngritjen e dorës. Pra cakton, nuk zgjedh. Duhet ta sqarojmë këtë gjë për publikun.
Nesër ka një mbledhje të këshillit të bashkisë së Himarës me një rend të përcaktuar. Unë nuk e di, kjo është totalisht kompetencë e këshillit të bashkisë. Janë ata përgjegjës për të vendosur në rend të ditës ose jo sipas mënyrës së funksionimit të këshillit të bashkisë për ta përcaktuar ose jo, do të bëhet apo nuk do të bëhet nesër caktimi i njërit nga dy nënkryetarët.’, u shpreh Tavo.