Prokuroria e Tiranës ka finalizuar hetimet për vrasjen e biznesmenit të ndërtimit Eduart Reçi, ngjarje e ndodhur më 13 nëntor 2024, dhe ka dërguar për gjykim dy vëllezërit Shkëlqim dhe Florian Dukaj, të cilët akuzohen si autorë të dyshuar të ekzekutimit.

Sipas dosjes hetimore, konflikti mes palëve kishte nisur prej vitesh, për shkak të një sipërfaqeje toke ku vëllezërit Dukaj kishin ndërtuar një lokal pa leje, në pronësi të Reçit. Biznesmeni 52-vjeçar, i angazhuar në ndërtimin e një pallati të ri në zonë, kërkonte zgjidhjen ligjore të çështjes, ndërsa mosmarrëveshjet mes tyre janë intensifikuar deri në tragjedi.

Prokuroria: Vëllezërit hartuan një plan të detajuar vrasjeje

Në njoftimin zyrtar, Prokuroria deklaron se për arsye pasurore, dy vëllezërit kanë planifikuar në detaje eliminimin e biznesmenit. Sipas akuzës:
• kishin studiuar lëvizjet, oraret dhe zonën përreth;
• ishin trajnuar në poligon qitjeje;
• kishin siguruar një armë dhe dylbi për qitje nga distanca;
• hedhja e fishekzjarrëve për 5 ditë rresht rezultoi të ishte pjesë e planit, me qëllim që banorët të mësoheshin me zhurmën dhe të mos identifikonin të shtënat e armës në natën e atentatit.

Si ndodhi ekzekutimi

Ngjarja ndodhi rreth orës 22:40 të 13 nëntorit, në rrugën “Faik Konica”, përballë Fakultetit të Histori-Filologjisë. Eduart Reçi ishte në sheshpushimin e pallatit të tij, duke parë telefonin ose duke tentuar të kryente një telefonatë, kur u qëllua me një plumb të vetëm në kokë, nga një distancë e largët.

Biznesmeni u dërgua te Spitali i Traumës, por nuk arriti të mbijetonte.

Kamerat e sigurisë kanë filmuar vetëm momentin kur ai rrëzohet përtokë, pa arritur të kapin autorët apo pozicionin nga u qëllua.

Viktima: ndërtues, ish-punonjës i SHISH dhe baba i dy fëmijëve

Reçi kishte ndërtuar ndër vite dy pallate dhe një vilë në Tiranë, ku kishte dhënë me qira ambiente banimi dhe tregtare. Familjarët kanë deklaruar se ai “nuk kishte konflikte personale”, ndërsa hetimet zbuluan se problemi kryesor lidhej me tokën e pushtuar nga lokali i vëllezërve Dukaj.

Dy të pandehurit përballen me akuzat e rënda

Dosja e plotë tashmë i ka kaluar Gjykatës, ndërsa Shkëlqim dhe Florian Dukaj do të gjykohen për:
• vrasje me paramendim në bashkëpunim;
• armëmbajtje pa leje;
• dhe veprime për fshehjen e provave.

Hetimet vijojnë për identifikimin e personit që mund të ketë kryer qitjen, pasi dyshohet se vëllezërit kanë përdorur një ekzekutor të tretë ende të paidentifikuar.