Është mbyllur paqësisht protesta e thirrur nga ish-kryeministri Sali Berisha kundër vizitës së Presidentit serb Aleksandar Vuçiç në kuadër të “Open Balkan” dhe kundër korrupsionit qeveritar, që mori shkas nga afera e inceneratorëve.

Ka zgjatur rreth 100 minuta tubimi, i nisur nga selia e PD në orën 16:20 dhe më pas përfunduar para Kryeministrisë, ku një pjesë e përfaqësuesve mbajtën dhe fjalime. Protesta u mbyll në orën 18:00 me fjalimin e ish-kryeministrit Sali Berisha, i cili më pas është përcjellë nga protestuesit deri pranë shtëpisë së tij.

Nga sheshi përball zyrës së kreut të ekzekutivit, Berisha e paralajmëroi atë që të mos të guxojë t’i dalë përpara ortekut që sapo ka nisur, pasi është në minorancë.

Gjithashtu ish-kryeministri theksoi se protesta e ditës së sotme ishte pikënisje e një serie protestash që do të kulmojnë me largimin e atij që ai e quan narkoshteti.

“Ky ortek nuk ndalet më, ndaj dhe më lejoni ta paralajmëroj Edi Ramën, mos guxo t’i dalësh para. Mos mendo se me pakicë dhe stërpakicë mund të mundësh shumicën. Ne nuk ka forcë në botë që na ndalon në rrugën tonë. Kjo është protesta e parë, ju ftoj të qëndrojmë të vendosur për serinë e pafundme të protestave derisa të çlirojmë Shqipërinë nga narkoshteti dhe të rikthejmë votën e lirë. Zoti i bekoftë shqiptarët kudo që janë, zoti e bekoftë flamurin tonë”, tha Berisha.