Është zbardhur dëshmia e Gerond Meçes, biznesmenit që u rrëmbye dhe u kërcënua për të hequr dorë nga ankimimet për disa tendera shtetërorë, ngjarje kjo pjesë e hetimeve të AKSHI-së.

Sipas deklarimeve të tij, zëvendësdrejtori i Drejtorisë Vendore të Policisë Tiranë, Erion Ismaili, i ka kërkuar që “të rrinte larg AKSHI-t”. Hetimet dhe pamjet filmike të sekuestruara në zyrën e shtetasit Ergys Agasi tregojnë takime të shumta mes tij dhe Ismailit, duke ngritur dyshime për lidhje shoqërore dhe interesa të përbashkëta.

Biznesmeni u mbajt për disa orë nën presion dhe kërcënime, me qëllim që ai të tërhiqej nga ankesat për procedurat e tenderëve të AKSHI-t. Pas pranimit të Meçes për të hequr dorë nga ankimimet, rrëmbyesit e lanë të lirë në një zonë rurale të qarkut Elbasan.

Hetimet e mëtejshme kanë nxjerrë në pah se urdhri për rrëmbimin dyshohet se ka ardhur nga një grup kriminal i drejtuar nga Ergys Agasi dhe Ermal Beqiri, të cilët aktualisht janë shpallur në kërkim nga autoritetet.