Një histori e komplikuar sentimentale dhe financiare ka nxjerrë në pah tensione mes katër personave të njohur në botën e krimit në Shqipëri: Talo Çela, Altin Ndoci, Nuredin Dumani dhe Dashnor Dumani. Sipas deklarimeve të Erjon Alibejt, i akuzuar nga SPAK për financimin e një serie vrasjesh dhe aktualisht bashkëpunëtor i prokurorisë, një histori e një gruaje në familjen e Nuredin Dumanit dhe një pagesë e papaguar prej 500 mijë eurosh lidhur me grabitjen e parave në aeroportin e Rinasit kanë shkaktuar përplasjen e ashpër mes katër miqve të vjetër.

Sipas rrëfimit të Alibejt, Altin Ndoci dhe Dashnor Dumani janë përplasur fizikisht në Durrës, ku kanë përdorur edhe grushtet dhe gurët gjatë një konflikti të hapur. Në këtë përleshje ka ndërhyrë Talo Çela, i cili shpesh ka vepruar si ndërmjetës për të qetësuar tensionet mes tyre.

Alibej tregon se gjatë një bisede me Nuredin Dumanin në bazën e tij në Elbasan, ky i fundit i ka përmendur borxhin e pashlyer prej 500 mijë eurosh nga grabitja e Rinasit. “Talo Çela, ma pati premtu 500 mijë euro që do më jipte për grabitjen e Rinasit që ka ba… Vazhdon të më maj dhe sot e kësaj dite var si legen. Unë sot jam pa buk, shpia ime është pa buk, këto kanë marrë miliona, dhe s’më kanë dhanë asnjë lek,” ka thënë Nuredin Dumani, sipas deklarimit të Alibejt.

Rrëfimi i bashkëpunëtorit të SPAK zbulon gjithashtu një situatë delikate personale: sipas tij, Talo Çela ka pasur një histori me një grua nga familja Duman, çka ka nxitur më tej tensionin mes miqve të dikurshëm. Alibej thekson se kishte parë me sytë e tij konfliktin dhe përplasjen mes miqve, duke e bërë situatën të rrezikshme dhe të komplikuar për të gjithë të përfshirët.

Hetimet dhe dëshmitë e deritanishme të prokurorisë japin një panoramë të tensionuar, ku borxhet, historitë sentimentale dhe krimi i organizuar janë të lidhura ngushtë dhe kanë shkaktuar konflikte të dhunshme mes katër figurave të njohura në botën e krimit.