Ditën e sotme ,19 qershor, mbi 30 mijë maturantë do t’i nënshtrohen testit të lëndës me zgjedhje, i cili është edhe provimi i fundit për maturën shtetërore 2023.

Testi do të nisë në orën 10:00 dhe do të zgjasë 2 orë e 30 minuta.

Provimet e Maturës nisën më 1 qershor, ku nxënësit iu nënshtruan testit të parë, atij të Gjuhës së Huaj në datën 1 qershor, ndërsa një javë më pas atë të lëndën Gjuhë Shqipe Letërsi, si edhe testi i Matematikës në 13 qershor.

Ashtu si vitet e kaluara, edhe kësaj here janë publikuar në rrjetet sociale tezat e provimeve, thuajse as 20 minuta pas fillimit të testit, fakt ky i pranuar dhe nga vetë Ministria e Arsimit.

Përfaqësuesit e kësaj të fundit thonë se kjo nuk e ka cenuar aspak mbarëvajtjen e procesit.

Testi për secilin nga provimet e Maturës Shtetërore 2023 vlerësohet me 60 pikë maksimale, ndërsa për nxënësit që rezultojnë mbetës në provime, ata kanë mundësi të testojnë sërish njohuritë në sesionin e dytë.