Tiranë – Ndeshja e zhvilluar mes Shqipërisë dhe Serbisë në kuadër të kualifikueseve për Kampionatin Botëror përfundoi në barazim pa gola (0-0), por jo pa shkaktuar polemika të forta në media. Gazeta serbe “Pink” dhe portale të tjera në Beograd kanë pasqyruar takimin me tone kritike, duke dënuar ashpër sjelljen e tifozëve shqiptarë dhe duke akuzuar për mungesë reagimi nga arbitri.

Sipas raporteve serbe, atmosfera në stadiumin e Tiranës ishte shumë tensionuar dhe herë pas here situata dilte jashtë kontrollit. Disa futbollistë të kombëtares serbe u goditën me objekte të hedhura nga tribunat, ndërsa loja u ndërpre disa herë për shkak të incidenteve. Mediat në Serbi kritikuan gjyqtarin për mosndërhyrje dhe theksuan se sipas rregullave të UEFA-s, arbitri duhej të ndërpriste ose evakuonte tribunat.

Një nga portale më të mëdha serbe shkroi se nëse një skenar i tillë do të ndodhte në Beograd, ndeshja do të ndërpritej menjëherë, duke hedhur dyshime mbi standardet e drejtësisë sportive.

Mediat serbe përdorën terma si “terror”, “skandal” dhe “sulm ndaj lojtarëve tanë”, ndërsa përshkruan edhe momentin kur fëmijët shqiptarë në stadium bënë me duar shqiponjën dykrenare gjatë këndimit të himnit serb, duke e paraqitur si akt provokues dhe shkak tensioni.

Portali Blic shkroi se skuadra serbe “i mbijetoi një ferri të vërtetë”, teksa përmendi edhe ndërprerjet e shkaktuara nga hedhja e objekteve ndaj lojtarëve, por vuri në dyshim mungesën e guximit të gjyqtarit për të ndërprerë përfundimisht ndeshjen.

Nga ana tjetër, kjo fushatë mediatike në Serbi duket se injoron dhunën që futbollistët shqiptarë pësuan në Beograd para 11 vjetësh, një ngjarje që kishte sjellë ndërprerjen e ndeshjes dhe fitore 0-3 në tavolinë për Shqipërinë.

Takimi Shqipëri–Serbi mbetet kështu një nga më të tensionuarit dhe më të diskutuarit në historinë e futbollit ballkanik, ku sporti dhe politika vazhdojnë të përplasen edhe jashtë fushës së lojës.