Qytetarë nga e gjithë Shqipëria janë mbledhur sot përpara selisë së Partisë Demokratike në kuadër të protestës kombëtare të lajmëruar nga opozita. Protestuesit kanë shprehur pakënaqësinë e tyre ndaj qeverisë, duke ngritur shqetësime për rritjen e çmimeve dhe akuzat ndaj ish-zyrtarëve të lartë për korrupsion.

Gjatë protestës para Kryeministrisë, Fatmir Mediu theksoi se opozita po lufton për popullin dhe jo për pushtet. “Ne nuk jemi për pushtet, por për Shqipërinë,” tha ai, duke shtuar se “ata që sakrifikuan për të ardhmen e fëmijëve tanë janë ata që ne po mbrojmë.”

Mediu akuzoi qeverinë se po tallet me intelektualët dhe tha: “Jemi këtu në emër të intelektualëve që janë larguar nga qeveria. Jemi këtu ne emër të së ardhmes, e cila nuk mund të ndërtohet pa lirinë për të folur.”

Ai gjithashtu theksoi se opozita është kundër diktaturës komuniste dhe se do të vazhdojë të luftojë për një Shqipëri të lirë dhe demokratike.