Përveç takimeve zyrtare të zhvilluara në Kongresin amerikan, kryetari i Partisë Republikane dhe deputeti i Kuvendit të Shqipërisë, Fatmir Mediu, ka realizuar edhe disa takime informale me figura të rëndësishme të politikës amerikane.

Mediu bëri të ditur se ka zhvilluar një darkë miqësore me kongresmenin Pat, kongresmenin Ronny Jackson dhe më pas me senatorin republikan Ted Cruz. Në një reagim të publikuar në rrjetet sociale, ai theksoi gjithashtu se senatorët Mike Lee dhe Kevin Cramer mbeten miq të tij personalë dhe miq të Shqipërisë.

Sipas Mediut, gjatë këtyre takimeve janë diskutuar shqetësime serioze që lidhen me situatën politike dhe institucionale në Shqipëri.

“Në takime u diskutua për problemet në Shqipëri, shkatërrimin e standardeve dhe institucioneve demokratike, manipulimin e zgjedhjeve, bashkëpunimin e krimit të organizuar me qeverinë dhe pastrimin e parave,” shkruan Mediu.

Ai e cilësoi këto bisedime si të hapura dhe të sinqerta, duke nënvizuar se vëmendja e partnerëve amerikanë ndaj zhvillimeve në Shqipëri mbetet e lartë.

“Veç takimeve zyrtare në Kongres, Pat ishte kënaqësi të kalonim një darkë miqësore me të dhe kongresmenin Ronny Jackson, e më pas me senatorin Ted Cruz. Senatori Mike Lee dhe Kevin Cramer ngelen miq të mirë personalisht dhe të Shqipërisë,” përfundon reagimin e tij Mediu.

Takimet e zhvilluara në Uashington vijnë në një moment të tensionuar për politikën shqiptare, ndërsa opozita vijon të denoncojë atë që e cilëson si degradim të standardeve demokratike dhe kapje të institucioneve.