Burime të besueshme për Sinjalin bëjnë me dije se Meriton Mjekiqi dhe Rinor Mjekiqi janë arrestuar ditën e sotme, më 22 korrik 2025, lidhur me një incident të rëndë që dyshohet të ketë ndodhur më 11 korrik.

Sipas të dhënave që disponon redaksia, të dyshuarit ishin në arrati që prej ditës së ngjarjes, por janë paraqitur sot rreth orës 15:00 në Stacionin Policor në Obiliq, ku janë marrë në pyetje në prani të avokatëve mbrojtës.

Ngjarja në fjalë lidhet me një përleshje fizike, ku viktima, Egzon Grajqevci, ka pësuar lëndime të rënda trupore. Rrethanat dhe motivet e incidentit mbeten ende të paqarta, ndërsa hetimet janë në vijim.

Pas përfundimit të intervistimeve dhe veprimeve të para hetimore, Prokurori i Shtetit ka urdhëruar masën e ndalimit policor për 48 orë ndaj dy të dyshuarve. Ndaj tyre pritet të ndërmerren veprime të mëtejshme ligjore në varësi të ecurisë së hetimeve.