Në një intervistë për gazetën BILD, Kancelari gjerman Friedrich Merz deklaroi se Shtetet e Bashkuara dhe në mënyrë të veçantë Presidenti Donald Trump po e humbasin durimin me Vladimir Putinin, për shkak të mungesës së vullnetit për armëpushim në Ukrainë.

Merz theksoi se Perëndimi i ka bërë Kremlinit një ofertë konkrete për një armëpushim 30-ditor, për të krijuar hapësirë për përgatitjen e bisedimeve të paqes. “Topi tani është në fushën e Putinit. Ai duhet të përgjigjet”, deklaroi ai.

Nëse nuk arrihet një marrëveshje, Perëndimi është i gatshëm për masa të reja. “Në rast refuzimi, do të ketë një shtrëngim serioz të sanksioneve dhe një mbështetje më të gjerë për Ukrainën – politike, financiare dhe ushtarake”, paralajmëroi kancelari gjerman.

Merz nënvizoi se SHBA dhe Trump e mbështesin këtë qasje, duke shtuar se “po humbasin durimin” me Putinin. Ai vuri në dukje se ekziston një nivel i lartë konsensusi mes aleatëve evropianë dhe SHBA-së, duke përmendur një bashkëpunim të ngushtë transatlantik.

Në lidhje me mundësinë e negociatave të drejtpërdrejta me Putinin, Merz u shpreh i hapur: “Nëse ndihmon për t’i dhënë fund luftës, jam gati të bëj shumë. Por fillimisht, duhet të arrijmë qëllimin e një armëpushimi pas kësaj fundjave.”

Ky qëndrim shënon një rritje të presionit diplomatik dhe ekonomik ndaj Moskës nga blloku transatlantik në një fazë vendimtare të luftës.