Deputeti demokrat Dashnor Sula ka reaguar ashpër pas vendimit të Gjykatës së Apelit për të lënë në fuqi dënimin e deputetit Ervin Salianji. Sula e cilëson këtë vendim si një rikthim të dënimeve politike, duke thënë se ai është një mesazh për të vrarë guximin e atyre që denoncojnë pushtetarët e inkriminuar.

Në një deklaratë për mediat, Sula theksoi: “Sot u rikthyen dënimet politike! Dënimi i deputetit Ervin Salianji është vendim politik. Ky është një mesazh për të vrarë kurajon/guximin e atyre që denoncojnë pushtetarët e inkriminuar.” Ai e përmendi si fakt se vëllai i ish-ministrit të Brendshëm u arrestua në Itali pas denoncimit të Salianjit, duke theksuar se ky rast ilustron se si ata që denoncojnë përballen me pasojat, ndërsa ata që janë të lidhur me pushtetin lëvizin të lirë.

“Kur kjo ndodh me një deputet që përfaqëson minimalisht 10 mijë qytetarë, e kuptoni çfarë ndodh me një qytetar të vetëm?!” vazhdoi Sula. Ai e përshkroi vendimin ndaj Salianjit si një “kambanë alarmi për demokracinë në vend” dhe theksoi se Partia Demokratike dhe opozita nuk duhet të pranojnë të nënshtrohen ndaj vendimeve politike.

Sula përfundoi duke bërë thirrje për qytetarët dhe opozitarët që të ngrihen përballë kësaj “arrogance të qeverisë” dhe të ndalojnë shkatërrimin e demokracisë në Shqipëri.