Hetimet e policisë kanë zbuluar se dy mesazhe zanore, të dërguara nga një profil i rremë në TikTok, ishin çuar në drejtimin e një kurthi vdekjeprurës që i mori jetën Ramazan Matajt, i cili u vra më 5 janar në fshatin Dragoç, Shkodër. Autori i krimit, Arjon Hasaj, tashmë i arrestuar, u prezantua si vajzë dhe e ftoi Matajn për takim, ku më pas e qëlloi me armë, duke e lënë të vdekur.

Nga hetimet, policia ka zbuluar se Hasaj kishte përdorur një numër telefoni të regjistruar përmes një adrese të rreme në TikTok, ku krijoi një profil me emrin “Majli 544”. Ky profil i dërgoi Matajt dy mesazhe zanore me zë gruaje, të cilat përfshinin mesazhe si: “Në mos besosh, lëre, mos shkruj më pra… unë femër jam…” dhe “Sonte ke rastin, shi asht tu ra… bukur do ishte…”.

Mataj, duke besuar se ishte një vajzë, mori makinën dhe shkoi për t’u takuar, por kjo u shndërrua në një kurth që çoi në vrasjen e tij. Pas ngjarjes, Arjon Hasaj u fiksua nga një kamerë sigurie, dhe në bazë të provave, u arrestua së bashku me të vëllanë, Klisman Hasaj.

Në dëshmitë e tij pas arrestimit, Arjon Hasaj u shpreh se Ramazan Mataj kishte ngacmuar motrën e tij dhe kishte ndikuar për shkatërrimin e martesave të familjes së tij.

Arjon Hasaj akuzohet për “Vrasje me paramendim” dhe “Mbajtje pa leje të armëve”, ndërsa Klisman Hasaj për “Sigurimin e kushteve dhe mjeteve për të kryer vrasje” dhe “Mbajtje pa leje të armëve”. Gjykata e Shkodrës ka vendosur t’i lërë ata në burg.