Ilir Meta, Presidenti i Partisë së Lirisë, ka njoftuar se nesër do të mbledhë Komitetin Drejtues Kombëtar për të votuar për Kryesinë e re, duke paralajmëruar largimin e Kryemadhit pas ndryshimeve të Konventës të së shtunës.
Në fjalën e tij, Meta theksoi nevojën për të bërë veprime konkrete për të rikthyer partinë në një mekanizëm që do të fuqizonte opozitarizimin.
“Duhet të kalojmë në veprime, nesër do të mbledhim Komitetin Drejtues Kombëtar. Të gjithë e ndoqën konventën tonë, na vjen keq për ata që u zhgënjyen nga mbarëvajtja e mrekullueshme. Shqiptarët panë një parti që ofron vetëm transparencë. Ne kemi një program të shkëlqyer, që ndihmon shumë qytetarë të këtij vendi që të ketë standarde. Shqipëria ka diell për të gjithë, por kaq nuk mjafton. Kjo forcë politike duhet të kthehet në mekanizëm për të fuqizuar opozitarizimin”, tha ai mes të tjerash.
Kryesia e Partisë së Lirisë vendosi t’i propozojë Komitetit Drejtues Kombëtar votimin e anëtarëve të Kryesisë aktuale për të formuar Kryesinë Politike të Partisë së Lirisë. Po ashtu, propozoi edhe emrat e rinj për të përforcuar Kryesinë Politike.
Kryesia e Partisë së Lirisë gjithashtu propozoi votimin e katër Zëvendës Sekretarëve të Përgjithshëm, në përputhje me Statutin e miratuar në Konventën Kombëtare.
