Kompania Meta, në pronësi të miliarderit Mark Zuckerberg, po përballet me një sfidë të madhe ligjore në SHBA, që mund të çojë në ndarjen e saj nga platformat gjigante Instagram dhe WhatsApp. Gjyqi nisi më 14 prill, si rezultat i një hetimi gjashtëvjeçar të Komisionit Federal të Tregtisë (FTC), që akuzon Metën për praktika antikonkurruese.

Sipas padisë së ngritur, Meta ka përdorur blerjet strategjike të Instagram në vitin 2012 dhe WhatsApp në vitin 2014 si mjete për të eliminuar konkurrencën dhe për të forcuar monopolin e saj në tregun e rrjeteve sociale personale. FTC citon një email të Zuckerberg të vitit 2008 ku ai shkruan: “Është më mirë të blesh sesa të konkurrosh”, duke e përdorur si provë për qëllimet e kompanisë për të zbehur garën.

Për më tepër, Meta akuzohet se ka vendosur kushte kufizuese për zhvilluesit që përdorin platformën e saj, duke frenuar kështu rritjen e konkurrentëve të mundshëm. Këto veprime, sipas FTC, kanë ndikuar negativisht tek përdoruesit, duke kufizuar zgjedhjen, ulur cilësinë dhe penguar inovacionin në rrjetet sociale.

Në përgjigje të këtyre akuzave, Meta i ka konsideruar pretendimet e FTC-së si të pabaza. Drejtoresha e çështjeve ligjore në Meta, Jennifer Newstead, deklaroi se tregu i rrjeteve sociale është shumë më kompleks sesa paraqitet nga FTC, dhe përfshin konkurrentë të fuqishëm si TikTok, YouTube, iMessage dhe X (ish-Twitter). Ajo theksoi gjithashtu se blerja e Instagram nga Meta e ka ndihmuar platformën të rritet dhe të përmirësojë ndjeshëm përvojën e përdoruesve.

Megjithatë, nëse Meta humbet këtë betejë ligjore, gjykata mund të urdhërojë shitjen e Instagram dhe WhatsApp, një vendim që do të trondiste peizazhin global të rrjeteve sociale dhe do të përbënte një precedent të fuqishëm për rregullimin e gjigantëve të teknologjisë në të ardhmen.