Washington D.C. – Ish-zonja e parë e SHBA-së, Michelle Obama, është rikthyer në qendër të vëmendjes publike, jo për ndonjë fjalim frymëzues apo projekt të ri, por për komentet e saj të fundit që kanë rritur spekulimet mbi një krizë të mundshme martesore me ish-presidentin Barack Obama.

Në një intervistë të publikuar të enjten në podkastin “Wild Card” të NPR, Michelle foli për thashethemet që qarkullojnë prej muajsh mbi një divorc të mundshëm, por përgjigjet e saj nuk arritën të shuajnë dyshimet. Përkundrazi, shumë i panë si të paqarta dhe nxitëse të mëtejshme të spekulimeve.

“Fakti që njerëzit nuk më shohin në takim me burrin tim ngjall thashetheme për fundin e martesës sonë,” tha ajo me ironi, ndërsa komentonte mungesën e prezencës publike me Barack-un.

Kur gazetarja Rachel Martin e cilësoi situatën si një “apokalips” të rrjeteve sociale, Michelle reagoi me humor:

“Është apokalipsi. Ne nuk bëjmë selfie. Nuk postojmë fotografi në Instagram çdo minutë të jetës sonë.”

Mungesa në ngjarje zyrtare rrit dyshimet

Megjithatë, mungesa e saj në disa ngjarje të rëndësishme publike ka ngjallur vërtet kuriozitet. Michelle nuk u pa në inaugurimin presidencial dhe as në funeralin e ish-presidentit Jimmy Carter, dy raste ku prania e saj pritej gjerësisht.

Dyshimet u shtuan edhe më shumë pas publikimit të fotove të Michelle me vajzat e saj në një klub ekskluziv plazhi në Majorka, pa praninë e Barack-ut. Komentuesit në rrjete sociale nisën të pyesnin për vendndodhjen e ish-presidentit dhe arsyen e mungesës së tij në një udhëtim familjar.

Michelle nuk i mohoi këto distanca, por i cilësoi si zgjedhje personale për qetësi dhe pushim:

“Një nga vendimet më të mëdha që mora këtë vit ishte të qëndroja në shtëpi dhe të mos merrja pjesë në funerale, inaugurime dhe të gjitha gjërat që duhet të bëj,” u shpreh ajo.

Privatësia apo distancë reale?

Megjithëse Michelle tentoi të normalizojë distancën si pjesë e jetës së zakonshme të një çifti që ruan privatësinë, shumë ndjekës dhe media interpretojnë komentet e saj si shenja të një ftohjeje të mundshme në marrëdhënien e saj me Barack-un. Asnjë prej tyre nuk ka dhënë deklaratë zyrtare që konfirmon apo mohon problemet martesore, duke lënë hapësirë për vazhdimin e spekulimeve.