Milan ka humbur edhe trofeun e dytë të sezonit, Superkupën e Italisë, pas eliminimit nga Kupa e Italisë, duke e lënë skuadrën kuqezi me një objektiv të vetëm: titullin e Serie A. Një mision që duket gjithnjë e më i vështirë, sidomos në kushtet e mungesës së një qendërsulmuesi vendimtar dhe një mbrojtësi qendror të besueshëm.

Humbja ndaj Napolit nxori në pah qartë dështimet e merkatos së Milanit, veçanërisht kur krahasohen me zgjedhjet e rivalëve. Protagonisti absolut i ndeshjes ishte Rasmus Hojlund, një emër që në të kaluarën ka qenë në radarët e kuqezinjve, por që përfundoi te Napoli për një kosto totale prej 50 milionë eurosh (6 milionë huazim dhe 44 milionë detyrim blerjeje).

Nga ana tjetër, Milani investoi 37 milionë euro për Nkunku dhe 18 milionë për De Winter, por asnjëri prej tyre nuk arriti të bënte diferencën. Edhe ardhja e Füllkrug nuk ka bindur se mund të mbushë boshllëkun në sulm, duke lënë shpresat e Milanit të varura nga një rikthim në formë i Rafael Leao-s.

Problemet nuk u kufizuan vetëm në repartin ofensiv. Edhe mbrojtja u shfaq e brishtë, sidomos në mungesë të Gabbia-s. De Winter, një tjetër investim i rëndësishëm, u dominua nga Hojlund, duke konfirmuar vështirësitë e repartit defensiv. Mesfusha gjithashtu vuajti, me Modric që u aktivizua vonë dhe me mungesë ndikimi nga lojtarët e stolit, si Jashari, çka thekson mungesën e thellësisë dhe cilësisë në skuadër.

Në këtë kontekst, shpenzimet e konsiderueshme për lojtarë që rezultuan protagonistë negativë e bëjnë zgjedhjen e Napolit për Hojlund të duket shumë më e mençur, si nga ana sportive ashtu edhe financiare.

Napoli i drejtuar nga Antonio Conte, pavarësisht lodhjes dhe mungesave, fitoi me meritë në fushë neutrale. Aksi Hojlund–Neres ishte vendimtar: sulmuesi danez realizoi dy gola dhe asistoi një tjetër, ndërsa Nkunku i Milanit shpërdoroi një rast të artë. Ndeshja u karakterizua nga tension i lartë, i cili kulmoi edhe me mosshtrëngimin e duarve mes trajnerëve Conte dhe Allegri në fund të takimit.

Sonte, vëmendja zhvendoset te gjysmëfinalja tjetër e Superkupës, ku Interi do të përballet me Bolognën, me zikaltërit që synojnë të fitojnë një trofe që mund t’u japë besim për sfidat e ardhshme të sezonit.