Ministri për Evropën dhe Punët e Jashtme, Igli Hasani, ka nisur udhëtimin sot nga India drejt Gjenevës. Në këtë qytet, më datat 26 – 27 shkurt, Ministri Hasani do të marrë pjesë në takimin e Nivelit të Lartë të Sesionit të 55-të të Këshillit të të Drejtave të Njeriut (KDNJ).

Shqipëria është anëtare e KDNJ-së me një mandat 3-vjeçar për periudhën 2024-2026, duke pjesëmarrë kështu në këtë forum të rëndësishëm të OKB-së që merret me çështjet e mbrojtjes dhe respektimit të të drejtave të njeriut. Ky është hera e dytë brenda një periudhe më pak se 10-vjeçare që Shqipëria bëhet pjesë e Këshillit të të Drejtave të Njeriut.

Gjatë qëndrimit në Gjenevë, Ministri Hasani pritet të takohet me Komisionerin e Lartë të OKB-së për të Drejtat e Njeriut dhe do të zhvillojë një takim me stafin shqiptar të punësuar pranë OKB në Gjenevë, duke përfshirë ekipin e Misionit të Republikës së Shqipërisë. Ministri do të ketë një rol aktiv në takimin e posaçëm të Grupit të Miqve për Llogaridhënien për Ukrainën, duke paraqitur mesazhin e Shqipërisë në këtë kontekst ndërkombëtar.