Ministria e Drejtësisë ka nisur dje zyrtarisht kërkesën për ekstradimin e Durim Bamit tek autoritetet e Emirateve të Bashkuara Arabe. Kjo kërkesë është dërguar në rrugë shkresore dhe elektronike. Ministria e Drejtësisë ka marrë njoftim nga Ministria e Jashtme se kërkesa dhe dosja për Bamin janë marrë në dorëzim nga pala arabe.
Më datën 2 qershor të këtij viti, Durim Bami u shoqërua nga Policia në Dubai, pasi ishte i shpallur në kërkim në kuadër të operacionit “Revansh”.
Operacioni “Revansh” dhe Konfliktet Kriminale
Sipas SPAK, në qendër të grupeve kriminale ishte ai i të shumëkërkuarit Ervis Martinajt, i cili ishte në aleancë me grupin kriminal që vepronte në qytetin e Lezhës të drejtuar nga ish-deputeti Arben Ndoka. Në zonën e Fushë-Krujës vepronte grupi i Durim Bamit, i cili ishte në konflikt të hapur me grupin e Martinajt dhe Ndokës.
Grupi i Bamit bëri aleancë me një grup kundërshtar të Martinajt që drejtohej nga Leonard Duka dhe Fatmir Hyseni, persona me precedentë të theksuar kriminal me qëllim vrasjen e Martinajt dhe Ndokës dhe anëtarëve të tjerë të këtyre grupeve kriminale.
Ndihma nga Brenda Paraburgimit
Në ndihmë të grupeve kriminale të drejtuara nga Ervis Martinaj dhe Arben Ndoka, vijnë edhe shtetasit Emiljano Shullazi dhe A.Avdylaj, që edhe pse në kushtet e paraburgimit, ndihmojnë në realizimin e vrasjes së Durim Bamit.
Hetimet dhe Grupet e Përfshira
Hetimet kanë evidentuar ekzistencën edhe të një grupi tjetër kriminal të drejtuar nga Edison Reçi. Ky shtetas, me qëllim hakmarrje, ka organizuar vrasjen e Preng Gjinit. Nga njoftimi i SPAK është evidentuar dhe përfshirja në ngjarjet kriminale e një ish-deputeti, Arben Ndoka, dhe katër punonjësve të policisë: drejtori i Drejtorisë Vendore të Policisë Lezhë, Henerigert Mitri, efektivët e RENEA-S, Altin Morina dhe efektivi me iniciale A.P.
