Ndryshimet në rregullore të propozuara nga Partia Socialiste janë miratuar në Këshillin e Mandateve, një sesion ku nuk ishte i pranishëm asnjë deputet i opozitës. Këto ndryshime pritet të votohen në Kuvend gjatë seancës parlamentare të enjten.

Maxhoranca ka shqyrtuar ndryshimet pas kaosit të shkaktuar nga deputetët e opozitës gjatë votimit të buxhetit për vitin 2024. Ndryshimet e rregulloreve parashikojnë ashpërsimin e masave për deputetët që bllokojnë punimet e Kuvendit, duke propozuar dënim maksimal deri në 60 ditë, në krahasim me dënimin aktual prej 10 ditësh.

Projekti-rregullore propozon masa të ashpra për rastet e ndezjes së tymueseve apo përplasjeve fizike me gardistë. Për shkeljet e caktuara, deputetët rrezikojnë masa disiplinore, përfshirë përjashtimin nga pjesëmarrja në komisione apo seancë plenare deri në 60 ditë. Propozimi vjen në kontekstin e kaosit të krijuar në seancën e kaluar dhe synon të rregullojë sjelljen dhe etikën parlamentare.