Kryeministri grek, Kyriakos Mitsotakis tha nga Brukseli se ishte “i zhgënjyer dhe i indinjuar” nga qëndrimi i qeverisë shqiptare dhe paraburgimi i kryetarit të zgjedhur të bashkisë së Himarës, Fredi Beleri, transmeton Protothema.

Gjatë një konference për shtyp, pas përfundimit të samitit të premten në Bruksel, kryeministri grek i ka dërguar një mesazh Tiranës dhe qeverisë Rama. Ai thotë se Beleri po mbahet në burg me dispozita të dyshimta procedurale.

“Pata rastin të informoj homologët e mi për atë që po ndodh sot në Shqipëri me rastin e kryebashkiakut të zgjedhur të Himarës dhe të shpreh zhgënjimin, indinjatën time për faktin se një kryetar i zgjedhur në fakt arrestohet dy ditë pas zgjedhjes së tij dhe ndodhet në burg – për ne – me dispozita të dyshimta procedurale”, tha ai.

“Greqia nuk do ta lërë të kalojë kështu. Unë e respektoj absolutisht ndarjen e pushteteve, dua të jem shumë i qartë për këtë, por nga ana tjetër nuk është një çështje që do ta lë të shkojë kështu, pa pasur një reagim nga Greqia . Dhe reagimi i parë u shpreh në Këshillin Evropian me konferencën e kolegëve të mi se çfarë saktësisht po ndodh sot me këtë rast”, përfundoi ai.