Moderatori i njohur, Arjon Muça, ishte i ftuar mëngjesin e kësaj të hëne në studion e emisionit “Wake Up”. Gjatë bisedës, ai komentoi rolin e tij si opinionist në emisionin e dashurisë “Për’puthen” në Top Channel dhe u ngacmua paksa lidhur me jetën e tij private.

Një nga pyetjet e drejtuara ishte nëse kishte qenë kriter që opinionistët e “Për’puthen” të ishin të përputhur për vete. Muça, duke qeshur, u përgjigj: “Unë e kisha, Eralda që është autorja më tha ‘nëse nuk e ke si eksperiencë, nuk flet dot’. Lidhet me logjikën e priftit. Prifti flet për familjen nga mëngjesi në darkë, por grua nuk ka në shtëpi”.

Një tjetër pyetje që iu drejtua ishte në lidhje me aludimet se ai kishte bërë baba, me gazetarët që kërkonin sqarime mbi këto lajme që kishin qarkulluar. “Për lajme qarkullojnë shumë në fakt, për shumë nga ne. S’di gjë, nuk kam info për këtë,” tha Muça.

Aludimet se ai kishte bërë baba u nxitën nga një postim në Instagram nga motra e tij, Frensi Muça. Ajo ndau një foto ku shfaqej këmba e një vajze të vogël dhe shkroi: “Ma vodhe zemrën. Mirë se erdhe më e vogla e familjes Muça. Halla të premton që do të jetë gjithmonë krah teje, shoqja e zemrës sime. Të duam pafund. 28.10.23”.

Kjo deklaratë ka rritur interesin e fansave dhe ndjekësve të Arjon Muçës, të cilët mezi presin më shumë detaje nga jeta e tij personale dhe profesionale.