Mbrëmja e djeshme në “Big Brother VIP Kosova” u shënua nga një prej momenteve më të forta emocionale të këtij edicioni, pasi Alba vendosi t’i japë fund lidhjes së saj jashtë shtëpisë, drejtpërdrejt gjatë transmetimit live.

Ngjarja nisi pas një dinamike mes banorëve, ku grupi i drejtuar nga Toni vendosi të fshehë “Stitch-in” e Albës, një lodër pellushi me vlerë të veçantë sentimentale për të, pasi lidhej me një kujtim nga partneri i saj jashtë shtëpisë. Ajo që për disa banorë u konsiderua si një lojë apo provokim, për Albën u kthye në pikën kulmore të një ngarkese emocionale të akumuluar prej kohësh.

E prekur thellë dhe e zhgënjyer nga mungesa e mbështetjes që ndiente nga jashtë shtëpisë, Alba zgjodhi të flasë hapur për ndjenjat e saj dhe të marrë një vendim drastik, duke e mbyllur publikisht marrëdhënien. Me tone të forta dhe emocione të dukshme, ajo u shpreh se kishte dhënë shumë në atë lidhje, pa marrë të njëjtin përkushtim në këmbim.

“Për një muaj do e rrotulloja botën. Nuk kam pse të merrem me një njeri me fjalë boshe pa vepra. Mungesa e përkrahjes nga ai nuk meriton as një takim,” deklaroi Alba mes revolte dhe zhgënjimi, duke prekur jo vetëm banorët, por edhe publikun përpara ekranit.

Gjatë rrëfimit të saj, Alba zbuloi se kriza në çift nuk ishte diçka e re. Sipas saj, marrëdhënia kishte qenë e paqëndrueshme edhe përpara hyrjes në Big Brother VIP Kosova, duke e përshkruar situatën me shprehjen popullore: “Kemi qenë para Bigut në situatën ‘hyp se të vrava, zbrit se të vrava’.”

Vendimi i saj i guximshëm dhe rrëfimi emocional u komentuan gjerësisht në rrjetet sociale, ku shumë ndjekës e panë si një moment sinqeriteti dhe force personale, ndërsa të tjerë e konsideruan një nga skenat më dramatike të këtij sezoni të Big Brother VIP Kosova.