Deputetja e Partisë së Lirisë, Monika Kryemadhi, doli sot para gazetarëve pas një qëndrimi dyorësh në Apelin e GJKKO-së, ku po shqyrtohej çështja për sekuestrimin e dy vilave të saj. Kryemadhi kritikoi prokurorinë duke e akuzuar se nuk ka marrë ekspertë financiarë për të vërtetuar pretendimet dhe se çështja bazohej vetëm në “thashetheme gazetareske”.

Ajo ngriti pyetje për standardet e ndjekura nga SPAK, duke krahasuar situatën e saj me atë të disa prokurorëve:
“Ngrita një pyetje, prokurorët e SPAK kanë marrë kredi, i japin me qira dhe marrin nga tre shtëpi. A është e paligjshme kjo? Mamaja ime e ka blerë me kredi dhe jeton aty,” deklaroi Kryemadhi.

Duke ironizuar situatën, Kryemadhi tha se nëse vilat i sekuestrohen, ajo do të detyrohet të jetojë në çadër:
“Do të jetojmë me çadër, si ata që jetojnë ende në çadra nga tërmeti. Do marrim një kontejner dhe do gjejmë një tokë për ta vendosur,” u shpreh ajo.

Ajo shtoi gjithashtu se është e sigurt që çështja do të shkojë në Gjykatën e Strasburgut dhe do të ndiqet deri në fund rruga ligjore për të kërkuar drejtësi.

Vendimi për sekuestron pritet të shpallet në ditët në vijim.