Detaje të reja kanë dalë në dritë për ngjarjen e rëndë në Orosh të Pukës, ku dy të rinj u ngujuan për disa orë në një banesë të braktisur, duke refuzuar t’i bindeshin urdhrave të policisë për t’u dorëzuar. Vetëm pas negociatave të gjata me një familjar, ata pranuan të dilnin dhe t’i dorëzoheshin forcave të rendit.

Gjatë kontrollit të banesës, policia ka sekuestruar tre armë zjarri dhe sasi municioni luftarak, çka konfirmon rrezikun e lartë të situatës.

Burime të sigurta bëjnë me dije se Eren (Erzen) Uka dyshohet të jetë vetëplagosur, me qëllim që dëmtimi i tij të interpretohej si pasojë e një ndërhyrjeje të policisë. Ai ka marrë një plagë të lehtë në zonën e kofshës.

Ndërkohë, Erzen Uka dhe Julian Cumraku nuk kanë pranuar ende të japin deklarime përpara hetuesve, duke vështirësuar ritmin e hetimit.

Sipas informacioneve paraprake, aksioni i Policisë së Shtetit kishte nisur që në mëngjesin e djeshëm, si pjesë e kontrollit të zonave të dyshuara për kultivim kanabisi.

Në momentin që patrulla iu afrua banesës, të rinjtë e armatosur kanë lëshuar paralajmërim kërcënues, duke thënë:
“Mos u afroni se do iu vras!”

Forcat RENEA u angazhuan për disa orë në vendngjarje, duke siguruar perimetrin dhe duke shmangur përshkallëzimin e situatës deri në dorëzimin e dy personave.

Hetimet vazhdojnë, ndërsa policia po verifikon motivet e qëndrimit të tyre në banesë dhe lidhjet e mundshme me aktivitete kriminale.