Moska po kërkon tërheqjen e trupave të NATO-s nga Rumania dhe Bullgaria, si pjesë e kërkesave të saj gjithëpërfshirëse të sigurisë nga aleanca e udhëhequr nga SHBA.

Rusia dëshiron “tërheqjen e forcave të huaja, pajisjeve dhe armëve” nga vendet që nuk ishin anëtarë të NATO-s para vitit 1997.  tha ministria e jashtme në një deklaratë.

“Këta përfshijnë Bullgarinë dhe Rumaninë”, shtoi deklarata, duke veçuar dy ish-aleatët e Traktatit të Varshavës që u bashkuan me NATO-n në 2004.

Ministria e jashtme e Rumanisë e cilësoi të premten kërkesën ruse si “të papranueshme” dhe shtoi se “nuk mund të jetë pjesë e një negocimi”.

Uashingtoni, i cili është i angazhuar në bisedime të nivelit të lartë për të parandaluar pushtimin e Ukrainës ka hedhur poshtë kërkesat e Moskës.

Sekretari amerikan i Shtetit Antony Blinken dhe ministri i Jashtëm rus Sergei Lavrov u takuan të premten në Gjenevë për një raund të ri bisedimesh për sigurinë për të lehtësuar tensionet në rritje midis Rusisë dhe Perëndimit mbi Ukrainën.

Vendet perëndimore akuzojnë Rusinë se ka grumbulluar dhjetëra mijëra trupa në kufirin me Ukrainën dhe se planifikon të pushtojë vendin ish-sovjetik.

Moska i mohon pretendimet dhe muajin e kaluar i paraqiti Uashingtonit dhe NATO-s propozime që synojnë të frenojnë zgjerimin drejt lindjes së aleancës ushtarake në këmbim të një de-përshkallëzimi të tensioneve.