Nga kjo e premte, Italia pritet të përfshihet nga një periudhë moti të keq, me ulje të ndjeshme të temperaturave. Andrea Garbinato nga uebsajti iLMeteo.it paralajmëron se pas valës së anormale të nxehtësisë gjatë festave të Krishtlindjeve, një periudhë ftohtësie pritet të nisë nga veriperëndimi dhe të përhapet gradualisht në të gjithë vendin deri në fundjavë.

Gjatë ditës, priten reshje të dendura shiu në disa rajone si Sardenja, Toskana dhe Piemonte. Pasditja do të sjellë reshje intensive në pjesën perëndimore të gadishullit Apenin, ndërkohë që në lartësitë mbi 800 metra pritet reshje bore. Situata pritet të përkeqësohet gjatë orëve të mbrëmjes së së premtes, me ciklonin Befana që do shoqërohet nga erërat e forta dhe stuhitë.

Zona që pritet të goditet më së shumti është jugu i Sardenjës, ndërkohë që në Alpe pritet të ketë më shumë se gjysmë metri dëborë. Pas Italisë, cikloni pritet të shkojë drejt detit Adriatik dhe pastaj të prekë Ballkanin. Ulja e temperaturave dhe i ftohti polar pritet të vazhdojë për tri ditë.

Ndërkaq, shirat e dendura kanë shkaktuar përmbytje në zonat veriore të Francës dhe Gjermanisë gjatë kësaj jave. Në vendet nordike, temperaturat në Suedi kanë arritur në minus 43.6 gradë.