Mbi dy milionë palestinezë të varur plotësisht nga ndihmat – mungesa e ushqimit dhe ujit po prek më së shumti gratë dhe fëmijët
Programi Botëror i Ushqimit i Kombeve të Bashkuara (WFP) ka dhënë alarmin për përkeqësimin dramatik të krizës humanitare në Rripin e Gazës, duke nënvizuar se mbi dy milionë palestinezë, shumica dërrmuese e të zhvendosur nga shtëpitë e tyre, janë aktualisht pa asnjë burim të ardhurash dhe mbijetojnë vetëm falë ndihmës humanitare.
Në një deklaratë të fundit, WFP paralajmëron se Gaza po përballet me shterimin e rezervave ushqimore, duke e çuar enklavën drejt një katastrofe të afërt urie. Sipas agjencisë, bllokimi i vazhdueshëm i vendkalimeve kufitare nga Izraeli ka ndalur efektivisht shpërndarjen e ndihmave jetike – përfshirë ushqimin, ilaçet dhe ujin – duke e bërë situatën gjithnjë e më të pamenaxhueshme.
“Gaza ka nevojë për një rrjedhë të qëndrueshme dhe të papenguar të ndihmës humanitare,” – thekson WFP. “Pa një ndërhyrje të menjëhershme, kolapsi i sigurisë ushqimore është i pashmangshëm.”
Gratë dhe fëmijët, në vijën e parë të vuajtjes
Në terren, gratë dhe fëmijët janë më të goditurit. Mungesa akute e ushqimit, ujit të pastër dhe shërbimeve bazë mjekësore po rrezikon jetën e mijëra civilëve. Shumë prej tyre janë të strehuar në objekte të mbipopulluara ose në kushte ekstreme, pa akses në ndihma emergjente apo mbështetje mjekësore.
Shtatë javë nën bllokadë
Kjo krizë ndodh në kohën kur bllokada në Gaza po i afrohet javës së shtatë, me pasoja të thella mbi popullsinë. Pavarësisht thirrjeve të vazhdueshme nga organizatat ndërkombëtare humanitare për rihapjen e vendkalimeve kufitare dhe vendosjen e një armëpushimi të qëndrueshëm, veprimet ushtarake dhe pengesat logjistike vazhdojnë të jenë pengesë e pakalueshme për ndihmën jetike.
Ndërkohë, dënimi ndërkombëtar ndaj veprimeve të Izraelit po rritet, teksa komuniteti ndërkombëtar kërkon ndërhyrje urgjente për të shmangur një katastrofë humanitare në shkallë të plotë. Por në mungesë të një zgjidhjeje të menjëhershme dhe angazhimi real politik, miliona jetë mbeten në rrezik.
