Dy liderët e opozitës, Sali Berisha dhe Ilir Meta, kanë reaguar ashpër pas ngjarjeve në Parlament, ku deputetët e tyre u përplasën me Gardën dhe Policinë e Shtetit. Edhe pse ndoqën zhvillimet nga distanca, të dy udhëheqësit ndanë një qëndrim të përbashkët, duke akuzuar qeverinë për veprime antidemokratike dhe shpërdorim të detyrës.

Sali Berisha, lideri i Partisë Demokratike, e cilësoi situatën si një shembull të kthimit të vendit në diktaturë. Ai akuzoi Gardën e Republikës për veprime të jashtëligjshme ndaj deputetëve të PD-së, duke theksuar se vendimi për nxjerrjen me forcë të një deputeteje ishte një urdhër që vinte nga nivelet më të larta të pushtetit. Berisha deklaroi se përdorimi i forcave speciale brenda Parlamentit, si RENEA, pa një gjendje të jashtëzakonshme, është një akt “puçist” dhe i paligjshëm, duke e lidhur këtë me një prirje drejt shtypjes së opozitës.

“Veprimet e djeshme janë tipike të një diktature. Garda veproi pa ligj dhe urdhra të qartë. Përdorimi i forcave speciale është një akt puçist dhe provë e qartë e inkriminimit të pushtetit,” tha Berisha.

Nga ana tjetër, Ilir Meta, kreu i Partisë së Lirisë, shtoi se veprimet e Policisë dhe Gardës ndaj deputetëve të opozitës në Parlament janë një tregues i inkriminimit të institucioneve shtetërore. Ai akuzoi Kryetaren e Kuvendit dhe Ministrin e Brendshëm për shpërdorim të detyrës, duke argumentuar se ata kanë urdhëruar dhunën ndaj deputetëve dhe kanë lejuar ndërhyrjen e Policisë brenda ambienteve të Kuvendit.

Meta e cilësoi situatën si një “akt kriminal dhe antiligjor” dhe theksoi se përballja me regjimin aktual është e pashmangshme.

“Kërcënimi me armë zjarri, kanosja me jetë dhe dhuna brenda ambienteve të Kuvendit dje, ndaj deputetëve të opozitës nga NarkoPolicia dhe NarkoGarda e Edi Ramës është një akt shumë i rëndë kriminal dhe antiligjor, që provon para të gjithë shqiptarëve jo vetëm inkriminimin e këtyre strukturave, por edhe rënien totale dhe banale të shtetit ligjor. Demokracia, pluralizmi politik dhe shteti ligjor mbizotërojnë mbi disiplinën parlamentare ndaj Kryetarja e Kuvendit, dhe ministri i Brendshëm, dje botërisht kanë konsumuar veprën penale të shpërdorimit të detyrës në bashkëpunim, duke urdhëruar Policinë të futet brenda perimetrit të Kuvendit dhe të konsumojë ato akte kriminale dhe skandaloze që i pamë të gjithë. Përballë kësaj junte që i drejton armën deputetëve të opozitës në Kuvend, e cila përndjek dhe burgos politikisht Opozitën, e vetmja alternativë mbetet përballja dhëmb për dhëmb deri në përmbysje të këtij Regjimi!”, tha ai. tha Meta në reagimin e tij.

Opozita ka premtuar se do të vazhdojë betejën kundër qeverisë me të gjitha mjetet e mundshme, ndërsa tensionet politike në vend vazhdojnë të thellohen.