Bota e kinemasë italiane është në zi. Aktori i njohur Remo Girone është ndarë nga jeta në moshën 76-vjeçare, duke lënë pas një trashëgimi të pasur artistike që shtrihet nga televizioni e kinemaja deri te teatri.

Girone ndërroi jetë papritur në shtëpinë e tij në Monako, ku jetonte prej vitesh së bashku me bashkëshorten e tij, Vittoria.

I lindur në Asmara të Eritresë, ai u bë një nga fytyrat më të dashura dhe të njohura të ekranit italian falë rolit të tij të paharrueshëm si Gaetano “Tano” Cariddi në serialin kult La Piovra. Ky personazh, simbol i lidhjeve të errëta mes mafies dhe botës së financave, e shndërroi Gironen në një ikonë televizive. Pamja e tij e ashpër dhe shikimi i ftohtë mbeten të gdhendura në kujtesën e publikut.

Por karriera e tij nuk u kufizua vetëm në këtë rol legjendar. Girone bashkëpunoi me mjeshtër të mëdhenj të kinemasë italiane si Ettore Scola, si dhe me regjisorë të njohur ndërkombëtarë, përfshirë Peter Greenaway dhe Andrea Molaioli.

Në vitet e fundit, aktori tregoi edhe njëherë shkathtësinë e tij, duke u shfaqur në projekte të suksesshme si komedia “Çfarë na thotë truri”, epiku hollivudian Le Mans ’66, ku portretizoi legjendarin Enzo Ferrari, dhe së fundmi në The Equalizer 3.

Karizma, talenti dhe aftësia për të mishëruar personazhe komplekse e bënë Remo Gironen një nga figurat më të respektuara të kinemasë dhe teatrit italian.