Japonia po përballet me mungesë të disa prej produkteve më të njohura të Asahi Group Holdings, pasi një sulm i madh kibernetik ka ndërprerë aktivitetin e kompanisë në vend. Prej së hënës, fabrikat kryesore të prodhimit janë detyruar të ndalojnë punën, duke shkaktuar probleme në sistemet e porosive dhe shpërndarjes.

Rrjetet e mëdha të dyqaneve si 7-Eleven, FamilyMart dhe Lawson paralajmëruan konsumatorët se produktet emblemë të Asahi, përfshirë birrën Asahi Super Dry dhe çajet Famimaru, do të jenë me furnizime të kufizuara.

Në një deklaratë të bërë sot, presidenti dhe CEO i Asahi, Atsushi Katsuki, kërkoi falje për situatën dhe konfirmoi se kompania ka nisur përpunimin manual të porosive për të mbajtur furnizimin minimal në treg. Megjithatë, ai pranoi se ende nuk ka një afat të qartë për rikuperimin e plotë.

FamilyMart konfirmoi se çajet Famimaru do të jenë të pakta ose të padisponueshme për një periudhë, ndërsa 7-Eleven njoftoi pezullimin e dërgesave për Asahi Super Dry, një nga birrat më të shitura në Japoni.

Supermarketet dhe dyqanet e mëdha po kërkojnë alternativa për të minimizuar ndikimin tek konsumatorët. Ngjarja ka rikthyer në vëmendje rrezikun e sulmeve kibernetike ndaj industrisë ushqimore dhe të pijeve, një sektor ku ndërprerjet ndikojnë drejtpërdrejt në jetën e përditshme të qytetarëve.

Ekspertët e sigurisë paralajmërojnë se rasti Asahi duhet të shërbejë si një sinjal alarmi për kompanitë e tjera të mëdha japoneze, duke nënvizuar nevojën për masa më të forta mbrojtjeje digjitale.