Diplomati Ilir Shqina është ndarë nga jeta, duke lënë pas një boshllëk të ndjeshëm në radhët e administratës publike shqiptare. Lajmin e hidhur e ka bërë publik ish-ministrja dhe politikania Majlinda Bregu, përmes një postimi prekës në rrjetet sociale.

“Sapo mora lajmin e trishtë për ndarjen nga jeta të Ilir Shqina-s,” – shkruan Bregu në Facebook. “E kam njohur Ilirin kur të dy ishim pedagogë të rinj në Universitet, dhe më vonë pata fatin ta kem pranë si Këshilltar diplomatik në Ministrinë e Integrimit Europian, në vitet kur Shqipëria përballi një nga fazat më të rëndësishme të procesit të anëtarësimit në Europë.”

Ajo vlerëson kontributin e Shqinës jo vetëm profesional, por edhe njerëzor:

“Nuk kishim të njëjtat bindje politike, por Ilir solli në Ministrinë e Integrimit Evropian atë që mungon shpesh në administratë: korrektësinë, dinjitetin dhe maturinë si akt shërbimi publik.”

Shkaku i ndarjes nga jeta nuk është bërë publik. Megjithatë, lajmi ka sjellë reagime të dhimbshme dhe ngushëllime nga kolegë, miq e bashkëpunëtorë që e kanë njohur nga afër.

Ilir Shqina njihet gjithashtu për publikun shqiptar si ish-bashkëshorti i ish-deputetes dhe moderatores Grida Duma, me të cilën ka edhe një djalë, Darien.

Majlinda Bregu e mbyll fjalën e saj me një mesazh prekës:

“Ngushëllimet më të sinqerta për këtë dhimbje të parakohshme, familjes dhe të gjithë atyre që e njohën dhe e çmuan. U prehsh në paqe, Ilir.”

🕊️