Bilisht – Teuta Kaso, 66 vjeç, është gjetur e pajetë në banesën e saj në qytetin e Bilishtit. Sipas të dhënave të policisë, dyshohet se ajo është vetëhelmuar, por pritet ekspertiza mjekoligjore për të përcaktuar shkakun e saktë të vdekjes.

Hetimet mbi këtë ngjarje vijnë një vit pas humbjes tragjike të djalit të saj, Rigels Kaso, i cili u gjet i dhunuar në rrugë dhe ndërroi jetë më pas në spitalin e Traumës në Tiranë.

Si ndodhi vdekja e Rigels Kasos?

42-vjeçari Rigels Kaso u plagos rëndë pas një sulmi fizik dhe u la pa ndihmë në mes të rrugës. Hetimet zbuluan se ai kishte komunikuar në “Instagram” me bashkëjetuesen e Bajram Gjelodhit, 34 vjeç, nga Peshkopia. Kaso kishte lënë një vendtakim me të, por në vend të saj kishte shkuar Gjelodhi.

Pas një konfrontimi, Gjelodhi e ka goditur me grushte, duke e rrëzuar në bordurë, çka solli dëmtime fatale për 42-vjeçarin.

Policia ka referuar materialet në Prokurori, ndërsa po vijojnë hetimet për vdekjen e Teuta Kasos, nëse ka ndonjë lidhje mes dy ngjarjeve tragjike që goditën këtë familje.