Në kuadër të operacionit të koduar “Joker”, policia e kryeqytetit ka arrestuar në kushtet e flagrancës 9 persona të përfshirë në organizimin e lojërave të fatit në kundërshtim me ligjin. Arrestimet u realizuan në një lokal në zonën e Sharrës, ku u kapën të dyshuarit duke zhvilluar aktivitete të paligjshme të lojërave të fatit.
Sipas njoftimit nga policia, gjatë operacionit janë sekuestruar 1 tavolinë pokeri me çipsa, disa aparate celulare dhe një pajisje DVR, që shërben për regjistrimin e aktiviteteve në lokal. Policia e Komisariatit të Policisë Nr. 6, në vazhdim të përpjekjeve për goditjen e veprimtarive të paligjshme të lojërave të fatit, kishte mbledhur informacion nga inteligjenca informative, që çoi në finalizimin e këtij operacioni.
Personat e arrestuar janë:
– D. Xh., 29 vjeç, banues në Tiranë, i akuzuar për “Organizimin ose ushtrimin e veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”, sipas nenit 197 dhe 198 të Kodit Penal.
– O. M., 35 vjeç
– E. H., 23 vjeç
– A. Xh., 30 vjeç
– L. Q., 22 vjeç
– E. Gj., 33 vjeç
– E. H., 24 vjeç
– E. K., 33 vjeç
– J. Ç., 39 vjeç
Të gjithë këta individë janë arrestuar për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, sipas nenit 197 të Kodit Penal. Pas arrestimeve, materialet janë dërguar në Prokurori për veprime të mëtejshme ligjore.
