Një situatë e tensionuar është regjistruar gjatë takimit të ish-kryeministrit Sali Berisha me demokratët e njësisë nr. 8 në Tiranë, ku një prej të pranishmëve ka shprehur hapur pakënaqësitë e tij ndaj drejtimit të Partisë Demokratike dhe zgjedhjeve të mundshme për Bashkinë e Tiranës.

Demokrati i drejtoi kritika të drejtpërdrejta Berishës, duke kërkuar që PD të paraqesë një kandidat politik serioz për Tiranën në rast të zgjedhjeve lokale dhe jo aktorin e humorit Florian Binaj, emri i të cilit ka qarkulluar së fundmi në diskutime publike.

“Nxirrni kandidatin e Tiranës, nuk kemi punë me Flor Binajn ne. Nëse na sillni Florian Binajn për kryebashkiak të Tiranës, unë për vete nuk e votoj”, i tha ai Berishës, mes reagimeve të sallës.

Deklarata e drejtpërdrejtë reflekton pakënaqësi në radhët e bazës demokrate, teksa PD ndodhet përballë sfidave të mëdha politike dhe ende nuk ka zyrtarizuar një emër për garën e mundshme për Bashkinë e Tiranës. Episodi nxori në pah pritshmëritë e elektoratit për kandidatë me profil politik dhe përvojë drejtuese, në një moment delikat për opozitën.